ننشر قصة صراع أهالي الوراق مع الحكومات المتعاقبة للحفاظ على جزيرتهم – علامات أونلاين
الرئيسية / أحداث / ننشر قصة صراع أهالي الوراق مع الحكومات المتعاقبة للحفاظ على جزيرتهم

ننشر قصة صراع أهالي الوراق مع الحكومات المتعاقبة للحفاظ على جزيرتهم

علامات أونلاين - وكالات:


تداول رواد مواقع التواصل الاجتماعي قصة صراع أهالي جزيرة الوراق مع الحكومات المتعاقبة منذ أيام مبارك وحتى الأحداث الأخيرة التي شهدتها الوراق أمس تحت حكم الانقلاب العسكري.

وجاء المنشور الذي تداوله رواد مواقع التواصل الاجتماعي كالتالي:

هو إيه موضوع جزيرة الوراق ده؟

الموضوع ببساطة إن فيه تلات جزر في النيل عليهم خناقات من زمان. الجزر دي هي جزيرة الوراق وجزيرة القرصاية وجزيرة الدهب. الجزر التلاتة معزولين عن المحافظات اللي حواليهم ومفيش أي جسر بينهم وبين البر التاني وطريقة الدخول والخروج للجزر دي هي المراكب والمعديات فقط. بسبب العزلة دي فضلت حياة الناس هناك بسيطة وبعيدة عن زحمة المدينة وأغلب السكان بيشتغلوا في الزراعة أو الصيد. لغاية هنا والموضوع مجرد ناس بسيطة عايشين على أرضهم بيزرعوها من زمان وعايشين على رزقها بدون ما يمدوا ايدهم لحكومة ولا لغيرها بل بالعكس دول ناس بيشتغلوا وبيعرقوا في أرضهم وبينتجوا للبلد وللناس.

الصراع الأول مع حكومة مبارك

لكن في سنة 2002 ظهر مجموعة من رجال الأعمال اللي تبع جمال مبارك وحاولوا يستولوا على أراضي الجزر التلاتة عشان يعملوا عليهم منتجعات سياحية ومساكن للأغنيا على حساب حياة الناس الفقرا والغلابة!

قامت وقتها حكومة عاطف عبيد في 2002 طلعت قرار وقالت إن سكان جزيرة الوراق بلطجية وسارقين أرض الحكومة وإن الحكومة هتطردهم من أراضيهم وتبيع الأرض للمستثمرين الأجانب. حصل وقتها اشتباكات بين الحكومة وسكان جزيرة الوراق وراح سكان الجزيرة رفعوا قضية في المحكمة الإدارية العليا عشان تلغي قرار الحكومة وبالفعل كسبوا القضية من أول جلسة والمحكمة أكدت ملكية الناس دي لأراضيهم وإنهم مش بلطجية ولا حاجة.

الصراع الثاني

مرت السنين واتجددت الاشتباكات في سنة 2010 ما بين أهالي جزيرة الوراق وما بين حكومة أحمد نظيف ولكن بسبب الثورة في 2011 رجال الأعمال خافوا من الأهالي وتراجعوا وخاصة إن أحمد نظيف نفسه كان مسجون.

تحت حكم الانقلاب

وتمر السنين تاني ومن شهر ظهر السيسي في التلفزيون وقال إن الحكومة هتشيل التعديات على مياه النيل واللي هو من الاخر معناه إن الحكومة هترجع تضرب الناس تاني ويحاولوا يطردوهم من أرضهم تاني. (خدوا بالكم هنا إن الأراضي دي ملك الناس بأمر محكمة والناس معاهم حجيات ملكية أراضيهم والسيسي بردو كان بيقول على بيوتهم تعديات) !!

امبارح بقى فوجيء أهالي الجزيرة بقوات الشرطة من ناحية وقوات الجيش من ناحية بيدخلوا على البيوت يطردوا الناس منها ويهدوها! الأهالي غضبوا وقرروا يدافعوا عن أرضهم وبالفعل حصلت اشتباكات عنيفة بين الأهالي وبين القوات واستشهد واحد من أهالي الجزيرة وهو بيدافع عن بيته وأهله ضد شرطة السيسي ورجال الأعمال.

انتهت الاشتباكات بانسحاب قوات الشرطة والجيش وتأجيل قرار الازالة بسبب دفاع الأهالي عن أراضيهم ولكن مين عارف ممكن يهاجموا الناس تاني امتى.

طيب يعني كده الجزيرة ملك الأهالي والحكومة ملهاش حاجة؟

ايوه. مساحة الجزيرة حوالي 1600 فدان منهم 60 فدان بس هم اللي ملك الدولة وبتمتلك وزارة الأوقاف 30 فدان منهم كانت أديتهم للفلاحين كحق انتفاع ويتبقى 30 فدان بس هم اللي ملك الدولة وباقي ال1600 ملك الناس.

طيب يعني الناس دول مش بلطجية؟

طبعا لأ. الأهالي بيملكوا الأرض دي ومعاهم حجيات ملكية وفي قرار محكمة من 2002 بيقول إنها أرضهم وغير كده المنطقة فيها وحدة محلية ووحدة صحية ومركز شرطة ومكتب بريد ومصلحة شهر عقاري فهل معقول الدولة تعمل المؤسسات دي كلها وتعمل مصلحة شهر عقاري توثق معاملات البيع والشراء بختم النسر وتخدم مصالح الناس وهم مجموعة بلطجية؟!

طيب الحكومة عايزة تهجرهم وتطردهم من أرضهم ليه؟

عشان يبيعوها لمستثمرين أجانب وخليجيين يعملوها منتجعات للأغنيا ويطردوا الفقرا في الشارع ويشردوهم من بيوتهم ويحرموهم من أكل عيشهم.

وسكان الجزيرة ناويين يعملوا ايه؟

سكان الجزيرة عددهم أكتر من 100 ألف واحد وناويين يحافظوا على أرضهم حتى لو اضطروا يشتبكوا مع الحكومة للأبد ولو وقع منهم ألف شهيد.


Comments

comments

شاهد أيضاً

تواصل فتح معبر رفح لليوم الثاني

تواصل سلطات الانقلاب المصرية، فتح معبر رفح البري لليوم الثاني على التوالي في كلا الاتجاهين …