طه رضوان: حوار بين الجنيه والدولار

 الجنيه: مالك يا ابن الأمريكانية

         ماشي وفاكر نفسك مين؟

         لابس نظارتك شمسية

        وجينز وكوتشي وسلسلتين

 

الدولار: حقي اتمختر ميه الميه

           وأنت تحط راسك في الطين

          اخرس ياد يا ابن المثالية

          لارجع أدوسك بالرجلين

 

الجنيه: شكلك ناسي يا ناكر أصلك

          ونسيت قيمتك كانت إيه

          وأنا هاحكي لك آه وهاقول لك

          ع اللي  ف قلبي  أنا مخبيه

 

الدولار: وأنا هاقف لك اهه واسمع لك

              قل لي حكايتي وعايز ايه

             بس إن قلت الهري الفاضي

             هامسك كوتشي وارنك بيه

 

الجنيه: كنا زمان – يا خسيس – أسيادك

            والخمسة منّك بجنيه

          كان العجل المخفي بتاعكم

          يتذلل لملكنا البيه

          ويبوس ايده وقبلها رجله

          كنا اسيادكم يابن الإيه

 

الدولار: أيوه حكى لي أبويا وجدي

             وكل كلامك عارف بيه

             كنتو زمان أسياد العالم

             بص لحالكم أصبح إيه

            نيلكم ناشف.. حالكم واقف

            ورئيسكم الله  يعلم بيه

 

الجنيه: اخرس هس اوعى تجيب سيرته

             إحنا  حبايبه  وضيّ عينيه

             خلص مصر من اللي باعوها

             ولمّ  فلوسها  ومخه  نبيه

 

الدولار: انتو حبايب مين يا مغفل؟

             ده عميلنا واحنا بنحميه

             حالف انه يطلع عينكم

           ويقتل كل شباب يلاقيه

 

الجنيه: أمال مرسي وكل عشيرته

             قل لي حكايته أصلها إيه

             الإعلام بوظ لي دماغي

             مش عارف انا افكر بيه

 

الدولار: مرسي ده كان قنبلة العالم

             هد  حصار  احنا  بنبنيه

            لو سبناه كان مصر بقى لها

            شنة ورنة .. فَدسْنا عليه

            كنت زماني بشبشب حافي

            وانت مفخفخ وعامل بيه

 

الجنيه: والله كلامك كله حقيقي

             والمنحوس ده اتفو عليه

             ده سرق قوتنا وبيموتنا

              لازم  نطلع  ثورة  عليه

 

الدولار: على ما تفوقوا وترجعوا تاني

             يبقى خربها ابن الايه

             وانت هتفضل راكع تحتي

            وبكره تشوفني بعشرة جنيه

             هيه نصيحة ولازم أقولها

               وكل كلامي ده تعمل بيه

               اللي بيقتل أهله وناسه

                يستاهل ما بيحصل ليه

شاهد أيضاً

محمد فاروق الإمام : التوازن سر البقاء

التوازن سر عظمة هذا الكون وجماله، وهو سمة من سماته، قال تعالى في سورة الرحمن: …