الحقيقة وراء فيديو سكارليت جوهانسون للضغط علي السيسي كما يرويها حسام بهجت

شرح حسام بهجت رئيس ومؤسس المبادرة المصرية للحقوق الشخصية اسباب مشاركة النجمة الامريكية سكارليت جوهانسن في حملة الدفاع عن المعتقلين الثلاثة من المبادرة وتوجيهها نداء لإطلاقهم عبر محطة سي ان ان ما اثار سخرية المصريين من السيسي وأنه رضخ امام ممثلة أمريكية ضغطت عليه.

قال بهجت في تعليق على حسابه علي فيس بوك: ليه سكارليت جوهانسن وهي دلوقتي أعلى نجمات هوليود أجرا تسجل وتنشر فيديو تحكي فيه عن المبادرة المصرية للحقوق الشخصية واهمية الشغل اللي عملناه طول ١٨ سنة وتطلب الإفراج عن جاسر وبشير وكريم وباتريك بالاسم؟! اشمعنا يعني؟ صدفة؟

النظريات الأكثر تشويقا المتداولة عالنت وفي اعلام الأجهزة:

١- ده اعلان مدفوع الأجر عن طريق شركة علاقات عامة في امريكا

٢- دي شغالة عند القطريين وبالأمارة ظهرت مرة في صورة جماعية في حفلة بحضور أمير قطر

٣- دي صديقة عمرو وأكد وبتنفذ اللي يطلبه وبالامارة طلعت في مشهد معاه في فيلم أمريكي

الحقيقة المفاجئة

من ٢٠٠٨ دخلت المبادرة في شراكة وتوأمة مع الاتحاد الامريكي للحريات المدنية ACLU  اقدم وأكبر منظمة حقوقية بتشتغل داخل امريكا ضد انتهاكات الحكومة الامريكية. المنظمة دي بتحتفل السنة دي بذكرى تأسيسها من ١٠٠ سنة في ١٩٢٠ وعندها ٤ مليون عضو في امريكا. وطبعا لعبت دور قيادي في مقاومة سياسات ترامب في السنين اللي فاتوا.

في ال ١٢ سنة دول اشتغلنا معاهم على حملات لاغلاق جوانتانامو ووقف تصدير الغاز المسيل للدموع ومحاسبة جورج بوش والسي آي إيه عن التعذيب في ابو غريب والسجون السرية وفي فترة اوباما رفعنا معاهم دعاوى مشتركة في القضاء الامريكي والبريطاني ضد برامج التجسس بعد تسريبات سنودن وحملة ضد توسع اوباما في الاغتيالات باستخدام الدرونز في اليمن وغيرها.

سكارلت جوهانسن واحدة من نجوم هوليود الكثيرين اللي بيدعموا الاتحاد وبيعارضوا ترامب. وفي ٢٠١٧ في واقعة شهيرة قدمت حفلة جوائز توني للمسرح وهي لابسة الشارة الزرقاء بتاعة حملة I Stand with the ACLU

بعد الهجمة على المبادرة زمايلنا في الaclu بعتوا لمكتب الفنانة يطلبوا منها الدعم. الفنانة وافقت بحماس خصوصا ان الرئيس المصري مشهور جدا في الاعلام الامريكي انه صديق وداعم لترامب. الفنانة سجلت الفيديو التضامن ومكتبها بعته للaclu وهما رفعوه عالنت وبعتوا لنا اللينك.

اخدت اللينك وبعته لمنتجة برنامج كريستيان أمانبور في CNN اللي كنت هاظهر معاها في نفس الليلة فعرضوه طبعا كفقرة من الحلقة وفي الإعادات وأمانبور شيرته على تويتر.

وبذلك أنتجنا اعلان بيحكي عن الهجمة على المبادرة ونداء لإطلاق زملاءنا ومن بطولة سوبر ستار واتذاع على شاشة سي ان ان في أهم برامجها وفي وقت الذروة ومن غير ولا مليم.

هي دي المؤامرة.