حسام بهجت يكتب : الخطايا العشر للدولجية في الأسبوع الأول من قمة المناخ

انتهى نصف المؤتمر وأحب أقدم بعض الاستشارات المجانية للمستجدين من مسؤولي الدولة من أجل حظ أفضل في الأسبوع القادم:

  1. مينفعش كل الأنصار اللي انت باعتهم يدافعوا عنك يبقوا كلهم لابسين بادجات الدولة المضيفة البنفسجي. انت عندك 60 ألف جمعية ومنقي الجمعيات اللي هتحضر بنفسك واشتريت كل إعلام البلد طلع لهم بادجات مجتمع مدني بادجات صحافة عشان ميبقاش مفضوح قوي ان كلهم بيمثلوا الحكومة وجايين على حسابها
  2. لما تحب تبوظ مؤتمر صحفي ابعت صحفي! مش تبعت نائب برلمان بيمثل الدولة وناجح على قايمة الأمن. الصحفي ممكن يعرف يسأل سؤال محرج وفاهم يتصرف ازاي قدام ٣٠٠ صحفي أجنبي. خصوصا إن إعلام المتحدة كله في المؤتمر بربطة المعلم دي ام سي واون وسي بي سي وغيرهم فملكش عذر مفروض يعملوا بلقمتهم
  3. لما تبعت حد يبوظ مؤتمر أو ندوة لازم تكون مكملة تعليمها وقادرة تصيغ سؤال بالعربي حتى بلاش الانجليزي لأن مداخلات الحضور مش بيانات سياسية وعلمهم يسألوا السؤال ويقعدوا مش يقفوا يزعقوا وسط القاعة ساعتها هيبان انهم جايين يشوشروا مش يسالوا والأمن هيسكتهم أو  هيطردهم لحفظ النظام
  4. لما تبعت حد يبوظ مؤتمر استخبى انت عشان يبان انه حاضر بشكل تلقائي وبصفة شخصية ولما يعك متجيش تاني يوم تنظم مظاهرات تضامن معاه وتسخر كل إعلام المتحدة واللجان الالكترونية يسجلوا معاه ويدافعوا عنه كده انت بتتحمل مسؤولية فشله وبتقول للعالم الراجل ده تبعي. حاول لما تزمر تخبي دقنك
  5. لما تحب تنظم مظاهرة تضامن ضد حد او مع حد متبعتش كل المتظاهرين لابسين يونيفورم واحد كان ممكن يسيبوا الجاكتات في حتة وييجوا متنكرين في صورة نشطاء بجد
  6. لما تعمل مظاهرة خصص شخص واحد بس يتكلم مع الاعلام باسم المظاهرة بدل ما القنوات تسجل مع متظاهرين فنكتشف انهم مش عارفين اسم اللي بيتضامنوا معاه ولا اسم اللي بيهاجموه ولا مين اللي باعتهم ولا موضوع المظاهرة لازم شوية تنسيق بين اجهزة الدولة.
  7. مينفعش الصبح تبلغ أسرة المعتقل انه متعلق له محاليل وبالليل النيابة العامة تطلع بيان انه مش مضرب اصلا. وتاني يوم مينفعش النائب العام يطلع تصريح للمحامي يزوره ولما يوصل السجن الامن الوطني يمنعه من الزيارة. كلموا بعض انتو زمايل
  8. مينفعش كل جرايد وقنوات العالم تكتب ان سجين اضرب عن الطعام وبطل شرب مية تقوم انت تخفيه عن الانظار تماما لمدة اسبوع انت كده بتزود الدوشة وانت اكتر حد مستفيد انك تسمح لأهله او محاميه يشوفوه ويطلعوا يطمنوا العالم انه عايش وواعي
  9. متقولش ايه اللي جايبكم المؤتمر وانتو مش بتوع بيئة ولا مناخ وانت في آخر لحظة باعت مئات من شبيبة هتلر بتوعك يحضروا المؤتمر وباسم الدولة المضيفة ومبيعرفوش يقولوا كلمة ونص عن البيئة والمناخ. وانت عارف الحقوقيين حضروا القمة اللي فاتت في جلاسجو وبيشاركوا كل سنة في كل قمة مناخ
  10. الكذب مالوش رجلين. اول ما تتمسك بكذبة واضحة بتفقد مصداقية خطابك ورسالتك تماما وللأبد. متقولش علاء محكوم عليه بالتحريض على العنف والكل عارف انه متهم في قضية نشر- متقولش انه محكوم جنائي وهو محكوم عليه ببوست فيسبوك عن معاملة السجناء

متقولش حصل على محاكمة عادلة وانت محاكمه قدام محكمة امن دولة طوارىء- متقولش انه غير مستحق العفو وانت لسه من اسبوعين مطلع عفو عن سجين زيه محكوم عليه بنفس التهمة من نفس المحكمة- متقولش ان اهله زاروه في السجن والدنيا كلها عارفة ان امه بتروح السجن كل يوم ومش عارفة حتى تستلم منه جواب-

متقولش ان سناء سيف جاية المؤتمر مع الوفد البريطاني وهي حاضرة مع جمعية مدنية مستقلة ببادج مراقب- متقولش ان الاسرة محاولتش استخدام الآليات الوطنية وهم موثقين كل خطوة خدوها مع النائب العام ورئاسة الجمهورية ولجنة العفو والمجلس القومي ومجلس الدولة

وأخيراً أوصي نفسي وإياكم بالحكمة الخالدة للصنايعي المصري وهي أن الأهم من الشغل تظبيط الشغل.

ـــــــــــــــــــــــــــــــــــــــــــــــــــــــــــــــــــــــــــــــــــ

*سلسلة تغريدات لمدير المبادرة المصرية للحقوق الشخصية

شاهد أيضاً

وائل قنديل يكتب : عبّاس وغانتس: إجماع فاسد أم انقسام حميد؟

لا ينتعش محمود عبّاس، وتدبّ فيه الحياة والقدرة على استئناف نشاطه في “مقاومة المقاومة” إلا …