فيديو| باسم عودة يكشف سبب “معاقبة” الداخلية له في سجنه

تداول نشطاء على مواقع التواصل الاجتماعي مقطعا لوزير التموين الأسبق باسم عودة يتحدث فيه عن انتهاكات وتعنتات يتعرض لها داخل محبسه.

وخلال جلسة نظر قضية “فض اعتصام رابعة العدوية” الثلاثاء، تحدث وزير التموين الأسبق باسم عودة عن منع سلطات سجن المزرعة له من حق الزيارة ورؤية عائلته، كما تناول عودة حبسه انفراديا لمدة أربع سنوات متواصلة.

وقال عودة في حديثه: “بكره هكمل 365 يوم لم أر فيهم زوجتي وأولادي ووالدتي، ممنوع من الزيارة بشكل متصل، رغم صدور حكم محكمة بتمكيني من حق الزيارة، ورغم مرور عدة مناسبات لم أر أهلي فيها”.

وأضاف: “في لايحة للسجون تديني حق الزيارة مرة كل أسبوعين لمدة 45 دقيقة، ليه مش بتتنفذ عليا، وأنا لم أرتكب مخالفة واحدة في السجن، طوال 4 سنوات بأي منطق؟ أنا عايز أفهم يعني.. بالشرع والدين ولا بالدستور والقانون، ولا بالشهامة اللي عند المصريين، إني مشوفش ولادي ومشوفش والدتي وزوجتي”.

وتساءل عودة: “هل هو انتقام سياسي؟ الناس دي مشبعتشي؟ 4 سنين مش كفاية؟ 4 سنين حبس انفرادي؟ آكل لوحدي، أنام لوحدي، أصلي فرض ربنا لوحدي؟ رمضان عدى عليا 4 سنين بفطر لوحدي، ممعيش حد أفطر معاه، هل ده إيه يعني؟ قتل ممنهج؟”.

وقال: “أنا مش بقول عاملونا كرجال للدولة خدموا بلدهم بأمانة وإخلاص، أنا بأطالب إنك تعاملني كمواطن مصري في بلدي، ليا حق في بلدي”.

ووأردف عودة : “أنا بقدم لحضرتك بلاغ رسمي في السيد مساعد وزير الداخلية لقطاع السجون السابق اللي زارني في زنزانتي السنة اللي فاتت بعد ما اشتكيت لحضرتك، وقاللي قدام ضباط المباحث منهم مأمور السجن ورئيس المباحث وقال لي: (انت بتشتكينا للمحكمة إنك مش بتزور طيب اقطعوا عنه الزيارة 3 شهور عشان تبأى تشتكينا تاني للمحكمة) هناك من يتعدى على سلطة المحكمة وعلى منظومة العدالة في البلد”.

وتابع: “أنا دكتور في الجامعة حياتي كلها أفينتها في العلم والقراءة، أنا ممنوع عني كتب التخصص بتاعتي، الأبحاث اللي عملتها أنا والطلبة بتوعي ممنوع إني أعرف عنها شيء وممنوع أعرف إيه النشر العلمي اللي تم منها”.

يذكر أن هيئة المحكمة أمرت عودة باستكمال شكواه في الجلسة المقبلة التي أجلتها إلى 14 نوفمبر الجاري.

حديث عودة أثار تفاعلات نشطاء، وانتقادهم للسلطات المصرية للانتهاكات التي تتم بحق عودة، منوهين إلى الإنجازات التي حققها خلال توليه منصب وزير التموين بحكومة هشام قنديل في عهد الرئيس المنتخب محمد مرسي.