علامات أونلاين alamatonline,موقع علامات
فى إطار محاربة الاغانى مجهولة الهوية وما يطلق عليها أعانى المهرجانات من قبل نقابة الموسيقيين.
طالب نقيب الموسيقيين هاني شاكر ، بفرض رقابة على الانترنت والحفاظ على حقوق الملكية، مؤكدا أن قراره بمنع مطربي المهرجانات نهائي.
جاء ذلك في مداخلة هاتفية مع الإعلامي أحمد موسى ببرنامجه على مسؤوليتي على قناة صدى البلد مساء الأحد.
نقيب الموسيقيين يؤكد أن قرار منع مطربي المهرجانات نهائي
وقال نقيب الموسيقيين : “أنا كان عندي من الأول استعداد إني أعمل روابط وضوابط لو فيه ناس ملتزمة، وواضح إن مش هيبقى فيه التزام، هو نجاحهم على النوعية دي”.
وأضاف: “هو لو غنى كويس هينجح ليه ؟ مش هينجح، لما بيغني على الفودكا والحشيش والمخدرات والخمرة والكلام ده كله هو ده اللي بيلفت نظر الناس.. هو عايز يبقى مختلف.”.
وتابع: “كل مغنين المهرجانات اتقفل عليهم خالص بالنسبة للنقابة .. لو حد عمل فيديو كليب ده مش دور النقابة .. وكذلك الكلام اللي بيتغنى ده دور المصنفات الفنية، مش هندي تصاريح تاني لمهرجانات بشكل قاطع”.
وعاد مؤكدا أن “أغاني (المهرجانات) دي انتشرت علشان مفيش مقابل .. ده نجاح نظري، أنا ممكن أزود عدد المشاهدين عندي كتير وفيه ناس تقدر تعمل ده واشتري، ده مش مؤشر للنجاح إلى جانب إن غياب الحفلات ودور الدولة في الأنتاج الفني الغنائي والمسرحي والسينمائي كل ده مؤثر كتير”.
وكان حسن شاكوش قد تقدم لاختبارات نقابة الموسيقيين للحصول على عضوية النقابة، فى نفس الوقت تقدم حمو بيكا أيضاً للاختبارات.
أعلن حسن شاكوش عن حصوله على عضوية نقابة الموسيقيين وسط أنباء عن تسلمه كارنيه النقابة.
خرج نقيب الموسيقيين هانى شاكر وأكد أن شاكوش اجتاز الاختبارات بنجاح ولكنه لم يصبح عضوا بعد.
فى نفس الوقت أكد هانى شاكر أن حمو بيكا رسب فى الاختبارات لأنه مبيعرفش يغنى ولا ينطق الكلام صح.
احتدم الصراع بين حمو بيكا وشاكوش بسبب إعطاء الأخير تصاريح غناء واقترابه من عضوية النقابة.
أهمية الرقابة في مواجهة سرقة الأغاني
وقال شاكر : “إحنا بقالنا 10 سنين سايبين الدنيا سداح مداح كده، ومفيش رقابة على الانترنت، لازم يكون فيه رقابة على الانترنت والفيسبوك واليوتيوب ولازم يبقى فيه رقابة على حقوق الملكية، ماينفعش مطرب يصرف ملايين على أغنية ويلاقيها اتسرقت في يوم وليلة”
وأضاف: “اللي معندوش ثقافة نثقفه مش ننزل بيه سابع أرض مش نقوله لو ماسبتينيش هشرب خمور وحشيش.. ياسلام .. يعني ده الحل؟ .. ويضحكوا عليا يقولولي غيرناها وبعدين ألاقيها في الحفلة .. لا ده لعب عيال ده”.
نقيب الموسيقيين يحذر من تخريب شباب مصر
وحذر نقيب الموسقيين من أغاني المهرجانات قائلا: “فيه ناس بتتبع هذا الفن وتقف وراه بكل قوة علشان تهد البني ادم المصري ده نوع من الحروب الجديدة اللي احنا بنواجهها .. مش كل الحروب عسكرية .. النهاردة يهدلك قوام الشباب في مصر وتبقى دي اللغة وواقفين عريانين من فوق كده وماسكين سيوف وقلة أدب”.
وأضاف أن “الطريقة اللي بيتكلموا بيها والأغاني اللي بيسمعوها طبعا ده تخريب للشباب في مصر”.
وأكد أن قرار منع ظهور مطربي المهرجانات على القنوات في يد وزير الإعلام، مضيفا: “أنا بناشده، كده كفاية أوي على النوعية دي وكفاية على مصر كده”.
