علامات أونلاين alamatonline,موقع علامات
أعلنت أسرة الدكتور عبد المنعم أبو الفتوح، رئيس حزب مصر القوية، تعرضه لأزمتين قلبيتين داخل محبسه في أسبوع واحد.
وقال حذيفة أبو الفتوح، الخميس: “أبويا اتعرض لأزمتين قلبيتين في خلال اسبوع واحد، النهاردة في الزيارة أبويا بلغني إنه تعرض لأزمة قلبية شديدة يوم الجمعة الماضي الموافق ١ يوليو الساعة ١١ وربع صباحا. الزنازين عادة بتكون مغلقة أيام الجمعة وأيام العطلات طول اليوم”
وتابع: “الجدعان في الزنازين فضلوا ينادوا لحد ما حضر طبيب السجن وأخصائي التمريض سريعا فعلا، لكن الشاويش رفض يفتح لهم باب الزنزانة في انتظار تعليمات نائب المأمور اللي مكنش فيه إمكانية للوصول له وقتها، ورغم خطورة حالته ووجود طبيب السجن والممرض على باب الزنزانة إلا إن الشاويش لم يستجيب إلا الساعة ١ بعد صلاة الجمعة، يعني بعد ساعتين إلا ربع بعد ما تم الوصول لنائب المأمور واللي سمح وقتها بفتح الزنزانة”
وأضاف: “بعدها تم نقل أبويا مباشرة للمركز الطبي داخل سجن المزرعة لإسعافه اللي تم عبر جرعات من موسع للشرايين ومتابعة ضغط الدم والنبض لحد ما استقرت حالته خلال ٣ ساعات تقريبا وبعدها تم إعادته إلى الزنزانة”
وواصل: “الأزمة التانية كانت إمبارح الأربعاء ٦ يوليو وحسب وصفه لها أنها كانت أشد وبرضو اقتصرت الاستجابة له على تناول موسع للشرايين ومتابعة طبية حتى استقرار حالته”
وقال نجل أبو الفتوح: “يوم الاتنين لما وصلت الطلبية، بلغتني يومها ادارة السجن بعد الانتظار إن مفيش جواب، أبويا بلغني النهاردة إن يومها كتب جواب بالفعل وذكر فيه اللي حصل له وسلم إدارة السجن الجواب ده لكن إدارة السجن منعت تسليمه ليا، يوم الثلاثاء لما روحت أحاول أزوره أو استلم جواب اطمن عليه، واستلمت ورقة من إدارة السجن مكتوب فيها ٤ طلبات بخط أبويا”
وتابع: أبويا بلغني إن يومها محدش بلغه إني جيت وطلبت جواب، وإن يومها إدارة السجن سلمته ورقة صغيرة وطلبت منه يكتب فيها الـ ٤ طلبات دول تحديدا علشان تم الموافقة عليهم علشان يتم توفيرهم له، فكتب فيها الـ ٤ طلبات دول بالفعل لكن دون علمه بحضوري، وقامت إدارة السجن بتسليمي الورقة دي تحديدا، كان من بين الطلبات دي جهاز قياس ضغط الدم وجهار قياس نسبة الأكسجين بالدم والنبض، وتم السماح اليوم بدخول جهاز قياس ضغط الدم فقط.
وأختتم: تقدمت اليوم ببلاغ للنائب العام بشأن ما تعرض له وملابساته واحتياجاته الطبية العاجلة يحمل رقم ١٧٦٣٤٣ عرائض المكتب الفني.
منتظرين إيه
بدوره قال أحمد أبو الفتوح، نجل أبو الفتوح: أبويا حياته في خطر، منتظرين إيه يحصل تاني علشان يتنقل مستشفى ياخد فيها العلاج والرعاية اللي محتاجها.
وتابع: في أسبوع واحد أزمتين في القلب، مش مكفيكم ظلم وسنين العمر اللي بتضيع فى قضية مافيهاش اتهام واحد بدليل، طلبنا نقله لمستشفى على نفقتنا اترفض، طلبنا نقله لأي مستشفي تابعة لوزارة الداخلية حتي لو مستشفي السجن اترفض، طلبنا تجهيز الزنزانة علشان تلائم احتياجه اترفض!.
وأضاف: الأداء ده في التعامل وعدم الاستجابة لطلباتنا الأساسية والقانونية مش هيكون له غير نتيجة واحدة إن أبويا يفقد حياته! الزنزانة اللي فيها أبويا زي
الغلاية على حد وصفه من شدة ارتفاع درجات حرارة الجو، أبويا اللي عمره ٧١ سنة مطلوب يفضل في الزنزانة دي يوميًا ٢٢ ساعة ونص دون حركة ومن يوم الخميس للسبت، دون خروج وأيام الإجازة الرسمية زي أيام العيد كلها دون خروج!، بقاء أبويا في الزنزانة اللي هو فيها فيه تعذيب نفسي وجسدي وبيعرض حياته لخطر حقيقي كل دقيقة، خرجوا أبويا وكفايه فُجر في التعامل وكفاية ظلم وكفاية تنكيل.
